Hetuesit britanikë njoftuan se një oficer i tretë i shërbimit rus të zbulimit u përfshi në helmimin në muajin mars të ish-spiunit Sergei Skripal dhe vajzës së tij Yulia, në qytetin Salisbury, në Anglinë jugore.
Zyrtarët thonë se ai është identifikuar nga shërbimet britanike të sigurisë si personi që studioi terrenin për të përgatitur sulmin me agjentin nervor. Autoritetet britanike thanë se për momentin nuk po e bëjnë publik emrin e tij, apo pseudonimin që ai mund të ketë përdorur.
Ky njoftim vjen ndërsa zyrtarët e Kremlinit u munduan të mos i kushtojnë rëndësi zbulimit gjatë kësaj jave se njëri nga autorët e sulmit është një kolonel i dekoruar i GRU-së, shërbimit ushtarak rus të zbulimit.
Kolonel Anatoliy Chepiga është një veteran i GRU-së që mendohet se ka shërbyer në njësitë elitë të forcave speciale në Afganistan, si dhe në Çeçeni dhe Ukrainë. Në vitin 2014, ai u nderua me medaljen “Hero i Federatës Ruse”, nderimin më të lartë të Rusisë. Sipas analistëve të sigurisë, medalja mund t’i jetë dhënë personalisht nga Presidenti rus Vladimir Putin.
Në filmimet e kamerave të sigurisë të publikuara nga autoritetet britanike, zoti Chepiga shfaqet duke qeshur, ndërsa së bashku me kolegun e tij me pseudonimin Alexander Petrov, ecin më 4 mars përgjatë një rruge në Salisbury, pak pasi helmuan Skripalin, ish-agjentin rus që kaloi në anën e britanikëve.
Të dy pretendojnë se janë specialistë të dietave sportive dhe thanë në një intervistë për kanalin e drejtuar nga Kremlini, “RT”, se kanë shkuar dy herë në Salisbury për të kundruar katedralen dhe orën e vjetër të qytetit. Ata thanë se u dështoi udhëtimi i parë për shkak të borës, ndërkohë që të dhënat e motit tregojnë se nuk pati borë në këtë qytet më datë 3 mars.
Grupi i gazetarisë investigative “Bellingcat”, së bashku me faqen e lajmeve “The Insider”, njoftuan se e identifikuan veteranin që pati përdorur pseudonimin Ruslan Boshirov, duke shqyrtuar të dhënat publike të akademive ushtarake ruse dhe duke krahasuar fotografitë e kadetëve. Një provë përfundimtare u paraqit kur u gjetën të dhënat e pasaportës së vërtetë të zotit Chepiga.
Ministria e jashtme ruse tha se ky është një lajm fals.
Zëdhënësi i Kremlinit, Dmitry Peskov u tha gazetarëve të enjten se “ashtu si ju, edhe ne po mësojmë rreth këtij hetimi nga mediat ku bëhet fjalë për njerëz që u ngjajnë njerëzve të tjerë”. Zyrtarë të tjerë të Kremlinit thonë se në shumë raste, njerëzit u ngjajnë të tjerëve.
Zyrtarët britanikë thonë se identifikimi i zotit Chepiga si një ndër autorët e tentativës për vrasje duke përdorur toksinën e rrallë “Novichok” e nxjerr të pabazë pretendimin e Kremlinit se nuk pati rol në këtë sulm. Gjithashtu, ata thonë se grada e tij e lartë në shërbimin GRU, sugjeron se sulmi ishte porositur nga vetë zyrtarët më të lartë të Kremlinit.
Sipas rrjetit “Bellingcat”, gjetjet e hetimit të tyre mbështeten edhe nga “burime të shumta pranë personit që konfirmuan identitetin e tij”. Zyrtarët britanikë thonë se nuk kanë asnjë dyshim për identifikimin, megjithëse nuk e konfirmojnë atë zyrtarisht, për arsye sigurie.
Banorët në fshatin e lindjes të zotit Chepiga, në Berezovka, rreth 640 kilometra pranë Moskës, u intervistuan nga gazeta ruse “Kommersant”, duke konfirmuar identitetin e tij dhe madje duke thënë se e dinin menjëherë se ishte ai edhe përpara se të botohej hetimi i rrjetit “Bellingcat”. Ata thanë se e patën njohur nga filmimet e kamerave të sigurisë të publikuara nga autoritetet britanike. Gazeta “Kommersant” thotë se banorët që folën ruajtën anonimitetin e tyre, për shkak se i frikësohen hakmarrjes.
“Po, ky është Tolya”, i tha një grua gazetës, duke përdorur nofkën e zotit Chepiga. Ajo thotë se ai ishte një i ri i disiplinuar. “Ai nuk pinte alkol, duhan dhe nuk përzihej kurrë me njerëz të papërshtatshëm”, tha ajo.
Analistët e sigurisë përmendin mundësinë se zoti Chepiga dhe zoti Skripal, ish-oficer i GRU-së, e njihnin njëri-tjetrin. Kjo mund t’i shtojë historisë edhe një aspekt personal. Zoti Skripal gjithashtu shërbeu në Afganistan, megjithëse jo si pjesë e forcave speciale dhe jo gjatë të njëjtës periudhë./voa
