Në kohën kur në pjesë të ndryshme të Europës, ndjenjat kundër emigrantëve nuk njohin veçse rritje, në një qytezë të vogël të Kalabrisë, vendas e të huaj bashkë kanë dalë në protestë për të mbështetur kryetarin e arrestuar të bashkisë.
Përkrahësit e Domenico Lucanos janë të bindur se ndalimi i tij është bërë për arsye politike. Në 2009-ën, pak pas rizgjedhjes në post dhe disa vite pasi i kishte hyrë politikave mikpritëse të emigracionit, mbi Lucanon shtinë nga dritarja e restorantit ku po hante me miqtë e tij.
Mafia e zonës i helmoi më vonë edhe dy qentë e shtëpisë. Asgjë prej këtyre megjithatë nuk e ndaloi që të vendoste një billboard në hyrje të qytetit kur shkruhej: “ Riace, vendi i mikpritjes“.
Emigrantë nga 20 vende të botës, përfshirë Eritrean, Somalinë, Nigerinë e Pakistanin, e kanë parë nga afër atë tabelë. Riace është shndërruar ngadalë në një model të shumëlavdëruar integrimi, por javën e kaluar Luacanos, njeriut që i ndryshoi jetën shumë italianëve e të huajve, iu vunë prangat me akuzën e nxitjes së emigracionit të paligjshëm. Për Matteo Salvinin, vlera e tij është “zero“, por qindra persona kanë dalë në protestë në mbështetje të kryebashkiakut të përshkruar prej tyre si njeri i ndershëm dhe altruist.
“Ky është një manifestim për të shprehur mbështetjen ndaj Mimmo Lucanos dhe familjes së tij dhe për të treguar se komuniteti i Riaces ka dëshmuar në rrjedhën e viteve se njerëzit mund të mikpriten duke respektuar të drejtat dhe dinjitetin e tyre”, tha Aboubakar Soumahoro, sindikalist.
Mafiozët vrasin, por një kryetar bashkie që bën mirë arrestohet? Kjo nuk ka kuptim, tha për “The Guardian” një protestuese, e identifikuar vetëm si Elisabeta.
