Kryeministri italian, me një propozim të ri buxheti për BE-në - Bota Sot
Kryeministri italian, me një propozim të ri buxheti për BE-në

Evropë

Kryeministri italian, me një propozim të ri buxheti për BE-në

Më: 4 dhjetor 2018 Në ora: 09:30
Kryeministri italian, Giuseppe Conte

Kryeministri italian, Giuseppe Conte pritet t’i prezantojë Brukselit një propozim të ri mbi buxhetin e vitit 2019, në orët e ardhshme, me synimin për të shmangur kështu procedurat disiplinore nga Bashkimi Europian.

Italia kishte hartuar një projektbuxhet ekspansionist, që parashikonte një rritje të deficitit në 2.4 për qind të prodhimit kombëtar (PBB-së) në vitin 2019, nga 1.8 që ishte për vitin aktual.

Bashkimi Europian e ka refuzuar propozimin italian, duke thënë se planet e qeverisë populiste nuk do ta ulnin borxhin publik të Italisë në përputhje me rregullat e unionit, ndaj ka urdhëruar Romën zyrtare ta rishikojë buxhetin në mënyrë që të shmangë një procedurë që do të ishte shembullore dhe do të çonte në gjoba të rënda.

Conte tha se propozimi i ri do të përfshijë në mënyrë të arsyeshme një deficit më të ulët sesa parashikimi i mëparshëm, por nuk dha detaje mbi planin e tij.

“Objektivi im është të shmang penalizimin e Italisë, që gjithsesi do të dëmtonte vendin tonë dhe do të rrezikonte të dëmtonte edhe Europën, – tha Conte për të përditshmen italiane “Avvenire”. – Jam duke e përfunduar propozimin që Bashkimi Europian do të duhet ta marrë në konsideratë më pas. Ai pritet të jetë gati në orët e ardhshme”.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...