Pilotja e parë femër te Ferrari

Formula 1

Pilotja e parë femër te Ferrari

Më: 17 shkurt 2021 Në ora: 11:16
Pilotja e parë femër te Ferrari

Pilotja 16-vjeçare Maya Weug është tashmë pjesë e historisë së Ferrarit, duke qenë femra e parë që hyn në Akademinë e “kokëkuqes”. Holandezja, në janar të këtij viti, u shpall fituese e “Girls on Track – Rising Star” dhe tani ëndërron të garojë një ditë në Formula 1. Pse jo, pikërisht me Ferrarin.

“Kur vendos kokoren dhe garojmë jemi të gjithë të njëjtë. Nuk shihet diferenca mes meshkujve dhe femrave. Të jem pjesë e kësaj akademie është një ndjesi e jashtëzakonshme për mua. Dhe, të jem femra e parë që bëj pjesë në këtë Akademi është diçka historike”, tha Weug për “Bild”.

“Shpresoj të tregoj se sa vlej dhe se mund t’ia dal mbanë.

Ëndrra ime është që një ditë të bëhem pilote e Formula 1. Kjo do të ishte e jashtëzakonshme”, u shpreh pilotja e re. Gjatë kësaj periudhe ajo synon një rritje profesionale, e mbështetur edhe nga mjaft personazhe të njohura të Ferrarit.

“Ndoshta jam një frymëzim i vogël për mjaft vajza të reja që duan të hyjnë në botën e garave. Unë mund t’u tregoj atyre se asgjë nuk mund t’i ndalë, të mos dorëzohen. Natyrisht që shumë djem nuk janë të kënaqur kur shohin se i mund një vajzë, por deri më tani nuk kam patur probleme”, tha Maya Weug.

commentFirst article
Sot mund të lexoni Shfletoni kopertinat