Mbreti Felipe VI i dha këtë mëngjes Keylor Navasit trofeun e Komunitetit Ibero-amerikan, në Pallatin Mbretëror të “El Pardos”, në Madrid.
Pas ceremonisë, portieri i Real Madridit foli për shtypin rreth situatës së tij në klubin e bardhë dhe rikthimin në portë ndaj Leganes, pas lëndimit të Thibaut Courtois.
"Ditën kur unë nuk mendoj se mund të jem titullar, do të shkoj në shtëpi. Gjithmonë kam punuar për këtë, por pastaj është një trajner që vendos dhe ne duhet të punojmë e të bëjmë gjëra të mira, sidomos kur na jepet mundësia për të luajtur.
Ndodhi tani, për shkak të lëndimit të Courtois, por nëse vazhdoj kështu, e di vetëm trajneri. Jam 100% në dispozicion të Solarit, duhet të jemi të bashkuar”, - tha kostarikani, i cili shtoi se ishte krenar për çmimin e marrë.
Disa fjalë nga portieri edhe për rinovimin me “Los Blancos”, që nuk duket në sfond: "Unë kam disa vite këtu, gjithmonë kam luftuar për të dhënë maksimumin. Ndoshta askush nuk e di, por unë jetoj të tashmen, e cila lidhet me Real Madridin. Do të vazhdoj të jap gjithçka këtu".
