Statistikat janë të gjitha në anën e tij, por për Krzysztof Piatek dukshëm nuk mjaftojnë.
Në të dytën sfidë si titullar, polaku shpërblen besimin e trajnerit Gattuso dhe gjen përsëri rrugën e rrjetës.
Golat janë misioni i tij, por bomberi kërkon që, përveç aspektit personal, të jetë i kënaqur edhe me atë ekipor.
Ai nuk ka mundur të gëlltisë barazimin ndaj Romës, ku dukshëm do të kishte preferuar tri pikët.
Këtë mendim ai e ka përforcuar edhe me një status në rrjetin social “Instagram”.
Përpara se të largohej nga kryeqyteti italian me skuadrën, Piatek ka publikuar një status ku flet qartë për zhgënjimin e tij për një ndeshje ku Milani mund të kishte marrë diçka më shumë.
“Shumë i lumtur për golin, por nga Roma për fat të keq nuk mundëm të largoheshim me më shumë se një pikë”, deklaronte polaku nga profili i tij social.