Alexis Sanchez vazhdon të jetë në qendër të kritikave për shkak të rendimentit zhgënjyes me fanellën e Manchester United. Pas humbjes në Champions League të pësuar kundër PSG-së dhe paraqitjes së dobët të tij, ka ardhur një lajm i çuditshëm në lidhje me gjendjen fizike të futbollistit në atë moment.
Në fakt, sipas "Daily Mail" dhe "The Sun", lojtari ka pësuar një dëmtim të çuditshëm gjatë nxehjes. Sanchez duhej të futej në fushë në fundin e pjesës së parë për të marrë vendin e të dëmtuarit Lingard, por diçka ka shkuar keq.
I shpërqendruar nga një aksion i lojës, kiliani është përplasur me anësorin italian Fabiano Preti. Ka qenë një përplasje aq e fortë, sa i ka shkaktuar, siç i ka thënë ai stafit mjekësor, një dëmtim në këmbë, sipër gjurit.
Kjo është arsyeja pse aktivizimi i tij ka ardhur në fillimin e pjesës së dytë, për t'i dhënë kohë që të rikuperonte pas goditjes së marrë.
