Manchester City fitoi 3-1 ndaj Watford dhe do të qëndrojë në krye të Premier League për të paktën edhe një javë tjetër, falë paraqitjes fenomenale të sulmuesit Raheem Sterling, i cili ishte njeriu i ndeshjes, me tre golat e tij brenda 15 minutave në fillim yë pjesës së dytë.
Pas një pjese të parë të vështirë për Citizens, të cilët nuk arritën të depërtonin në prapavijën e Watford, golat shpërthyen në pjesën e dytë.
Sterling zhbllokoi rezultatin në minutën e 46-të dhe dyfishoi katër minuta më pas.
Në minutën e 59’ sulmuesi i Anglisë vulosi fitoren e vendasve, duke kompletuar edhe tripletën e tij në më pak se çerek ore lojë.
Kjo ishte tripleta më e shpejtë që prej asaj të Romelu Lukakut të shënuar ndaj Southampton për 11 minuta dhe 37 sekonda, kur ishte tek Everton.
Watford shënoi golin e nderit në minutën e 66-të, kur të sapofuturit në fushë Deeney dhe Deulofeu kombinuan duke gjetur golin.
Rezultati mbeti i pandryshuar deri në fund, megjithëse City prodhoi disa mundësi të mira, por pa arritur t’i shfrytëzojë.