Lisbonë, stadiumi “Da Luz”, kati i parë. Zyra e Manuel Rui Costa mbikqyr fushën e blertë, ku luan Benfica. Ish-numri 10 i Fiorentinës dhe Milanit, që nga viti 2008 është drejtor sportiv i klubit portugez: “E mbaj veten në formë me ndeshjet e legjendave, këtë fundjavë do të jem protagonist i Milanit. Klubi kuqezi dhe Fiorentina janë gjithmonë në zemrën time”.
Rui Costa foli edhe për CR7, i cili vendosi t’i bashkohej Serie A verën e vitit të kaluar: “Sinqerisht, kur vendosi të largohej nga Real Madridi, zgjedhja që bëri nuk më habiti. Juventusi përbën një sfidë të madhe në karrierën e tij. Cristiano nuk ka frikë të përballet me eksperienca të reja. Ai fitoi gjithçka në Angli dhe Spanjë, tani dëshiron të përsërisë veten në Itali. Ai është më i miri në botë.
Kur skuadra e tij gjendet në vështirësi, Ronaldo shfaqet gjithmonë vendimtar. Dhe pastaj, a ju duket si 34 vjeç? Bardhezinjtë me një goditje kanë bërë një marrëveshje të trefishtë: kanë marrë numrin një në planet, një sportist të jashtëzakonshëm, dhe me këtë operacion e kanë valorizuar klubin në mbarë botën. Shikoni “tripletën” e tij ndaj Atletico Madridit. Ne portugezët mund të jemi të njëanshëm kur flasim për CR7, por kjo është e vërteta.
Para ndeshjes i thashë një mikut tim: skuadra e Simeone thuajse kurrë nuk pëson tre gola, por Juventusi ka vetëm një mundësi për t’u kualifikuar; nëse Cristiano është në njërën nga mbrëmjet e tij të mëdha. Kjo është pikërisht ajo që ndodhi. Ronaldo është stratosferik. Dhe duke e parë atë nga jashtë, te Juve duket shumë i lumtur”.
