Anglia i ka nisur shumë mirë kualifikimet për Kampionatin Evropian, pasi në ndeshjen e parë shënoi fitore bindëse (5:0) ndaj Çekisë.
Njëri nga futbollistët më të mirë të “Tre Luanëve”, Harry Kane thotë se Anglia po përfiton ende nga besimi që i dha paraqitja në Kupën e Botës dhe Ligën e Kombeve të vitit të kaluar. Të besuarit e trajnerit Gareth Southgate duket se vijojnë rrugën e mirë të arritjes në gjysmëfinale të një gare të madhe, për herë të parë që nga viti 1996 (Botërori i Rusisë).
Duke folur për ITV Sport, Kane tha: “Sistemi ynë patjetër i përshtatej Raheem Sterling. Me 4-3-3, krahët qëndrojnë lart. Ishte një paraqitje e shkëlqyer e ekipit, ne ushtruam presion të madh, ia bëmë të vështirë kundërshtarit, shënuam gola dhe ishim klinikë në çdo drejtim”, ka thënë Kane.
“Ne jemi duke e shijuar këtë moment të mirë, që ka nisur nga vera e kaluar në Rusi dhe ka vijuar me Ligën e Kombeve. Po luajmë futboll cilësor, të gjithë po e shprehin veten, kemi lojtarë të rinj, të uritur dhe kjo u dëshmua në ndeshjen me Çekinë”, ka shtuar sulmuesi anglez.
Anglia do të përballet me Malin e Zi në një tjetër eliminatore të “Euro 2020”, pastaj do të luajë sërish në gjysmëfinale të Ligës së Kombeve, kundër Holandës, më 6 qershor. Me Bullgarinë dhe Kosovën, dy rivalët e tjerë, skuadra e Southgate duhet të luajë në vijimësi për Grupin A. Një fitore të hënën do t’i vinte në pozitë të fortë “Tre Luanët” pas dy ndeshjeve.
