UEFA do të nisë një hetim në lidhje me ngjarjen e shëmtuar në Podgoricë, ku gjatë ndeshjes Mali i Zi-Angli u dëgjuan kore raciste dhe imitime majmunësh, adresuar lojtarëve të Anglisë dhe në veçanti mbrojtësit Danny Rose.
Qeveria e futbollit europian do të marrë raportin e ndeshjes nga përfaqësuesit e saj në Mal të Zi, si dhe do të dëgjojë dëshmitë e vëzhguesve të pavarur në ndeshje, para se të nisë hetimin për koret raciste.
Por, ajo që po lënë më së shumti përshtypje është deklarata e trajnerit të Malit të Zi, Lubisha Tumbakoviq në mediat botërore.
Tumbakoviq luajti ‘shurdhanin’ duke thënë pas ndeshjes se nuk i ka dëgjuar koret raciste dhe se është totalisht i pa informuar, shkruan Insporti.
Madje, dhe zyrtari për media tentoi të pengonte pyetjet e gazetarëve duke thënë se askush nuk i ka dëgjuar këto thirrje.
Kombëtarja e Malit të Zi pësoi debakël si nikoqire e Kombëtarës së Anglisë, duke u mposhtur me rezultat të thellë 5:1.
Tifozët malazezë gjatë ndeshjes ofenduan në baza racore futbollistët me ngjyrë, Raheem Sterling, Callum Hudson – Odoi dhe Danny Rose.