Llapi ka regjistruar fitoren e radhës, teksa ka mposhtur Ferizajn 2:0.
Triumfin e ka përjetuar edhe trajneri, Tahir Batatina, i cili ka thënë se me këtë fitore i ka treguar trajnerit rival, Bylbyl Sokolit se lider lind, nuk bëhesh.
“Isha i vëmendshëm dhe i kujdesshëm në këtë ndeshje. Fitorja e kishte vlerën e vet të madhe, duke e ditur se përballë kishim një skuadër që lufton për mbijetesë. Por, vlera e fitores ishte edhe për t’i treguar Bylbyl Sokolit se lider lind dhe nuk bëhesh. Këtë e dëshmova ku pas gjashtë ndeshjeve kundër tij, i kam fituar të gjitha”, deklaroi Batatina.
Ai ka goditur edhe disa donatorë që u larguan nga klubi kur Llapi kishte më së shumti nevojë.
“Kjo fitore shkon për ata donatorë që nuk i besuan projektit tim, po ranë në grackë dhe u larguan. E di se shumë prej tyre sot ndihen keq edhe nuk kan fjalë për të thënë. Natyrisht, fitorja shkon për kryetarin, drejtorët në diasporë dhe aksionarin që po më përkrah. Dua të them se i gjithë qyteti u ngrit në këmbë për të na mbështetur dhe ne do të luftojmë deri në ndeshjen e fundit për të dalë në Evropë”, përfundoi Batatina.
Llapi pas kësaj fitore ndodhet në pozitën e dytë.
