Trajneri i Chelsea, Maurizio Sarri, ka deklaruar sot se sezoni i “blues” nuk ka përfunduar ende. Në prag të ndeshjes së dytë gjysmëfinale të Europa League ndaj Eintracht Frankfurt, trajneri italian tha: “Jam i kënaqur që arritëm objektivin e parë, kualifikimin në Champions League. Gjithsesi, mund të gëzohemi edhe më shumë në muajin maj, pasi kemi ende edhe një objektiv për të arritur. Triumfin në Europa League”, tha Sarri.
Ndeshja e parë luajtur në Gjermani ka përfunduar në barazim 1-1. “Kemi përballë një rival të fortë dhe nuk ka për të qenë aspak e lehtë të kualifikohemi në finale. Eintracht është ekip agresiv, me lojtarë të fortë fizikisht dhe të aftë teknikisht. Ne e duam finalen, por do të djersitin shumë për të shkuar deri aty”, tha Sarri, që nuk do të ketë në dispozicion mesfushorin francez N’Golo Kante, i dëmtuar.
“Te Chelsea kam ardhur për të fituar trofe dhe Europa League mund të jetë i pari. Gjithsesi, le t’i bëjmë hapat një e nga një. Kualifikimi në finale do të ishte një arritje e madhe, ndaj le të përqendrohemi te ndeshja. Jemi më të qetë psikologjikisht pas kualifikimit në Champions, ndaj do t’i shkarkojmë të gjitha bateritë në Europa League”, tha Sarri.
