Lajmi ishte bërë publik para disa ditësh, nga Sport Bild, por tani edhe Borussia Dortmund e konfirmon: anësori i majtë Nico Schulz transferohet në Dortmund!
Dortmundi do të paguajë 27 milionë euro, një ndër shifrat më të larta që klubi verdhezi ka paguar ndonjëherë, ndërsa Hoffenheim feston, sepse e bleu mbrojtësin për vetëm 3 milionë euro nga Gladbach para 2 vitesh.
Në dy sezone në Hoffenhaim 26-vjeçari ka shkëlqyer (2 gola e 9 asiste këtë sezon), duke luajtur në të gjitha pozicionet në krahun e majtë, ndaj ka merituar grumbullimin nga kombëtarja gjermane. Edhe pse është lojtar me prirje të theksuar ofensive, Schulz pritet të luajë si mbrojtës i majtë në Dortmund, sepse Marcel Schmelzer është pranë fundit të karrierës, ndërsa Abdou Diallo e Raphael Guerreiro nuk ofrojnë garanci dhe nuk janë shumë të shpejtë.
Schulz është një dëshirë e trajnerit Lucien Favre, i cili në vitin 2015 e kërkoi te Gladbach, që pagoi 4 milionë euro për t'ia marrë Herthas.
"Nico Schulz është një mbrojtës që ka hedhur hapa gjigante këto vitet e fundit. Ashtu si kombëtarja gjermane, edhe ne do të përfitojmë në maksimum ngafiziku, ritmi dhe dinamizmi i tij", tha drejtori sportiv i Dortmundit, Michael Zorc.
"Dortmundi është një klub elitar, që i përshtatet shumë mirë stilit tim të lojës dhe besoj se mund ta ndihmoj me mënyrën si luaj. Së bashku mund të arrijmë gjëra të mëdha", tha Schulz pas firmës.