Klubi i Feronikelit, ka arritur ta mposhtë skuadrën e Trepçës 89, në finalen e Kupës të zhvilluar në stadiumin “Fadil Vokrri”.
Ndërkaq nuk ka vonuar shumë dhe ka ardhur urimi i presidentit të Federatës së Kosovës.
Ja urimi i plotë:
Të nderuar drejtues të KF “Feronikeli”,
Të nderuar futbollistë, trajnerë e staf administrativ i klubit,
Të nderuar tifozë,
Më lejoni që në emrin tim dhe të KE të FFK-së t’ju përgëzoj për fitoren e sotme të merituar në finalen e Digitalb Kupës së Kosovës.
Kurorëzimi juaj me trofeun e dytë në këtë edicion dëshmon punën e palodhshme, përkushtimin dhe investimin serioz që keni bërë si klub.
Paraqitjet e juaja gjatë tërë këtij edicioni, por edhe loja e sotme në finale kanë bërë që të gëzoni simpati të gjerë tek opinioni futbolldashës, me çka konfirmuat se me meritë e keni shijuar gëzimin e trofeve të këtij edicioni, njëherësh duke vendosur rekord në futbollin tonë – me fitimin për herë të dytë të kurorës së dyfishtë.
Me këtë rast, dua që t’ju uroj rrugëtim të mbarë në paraqitjen tuaj të parë në parakualifikueset e Ligës së Kampionëve, që sivjet do të zhvillohen në vendin tonë. Jam i bindur që përkrahja e tifozëve do të jetë madhështore dhe suksesi juaj nuk do të mungojë.
Mbarësi dhe suksese të mëtutjeshme!
Me respekt,
Agim Ademi, president i FFK-së.
