Borussia e Dortmundit nuk do të mjaftohet me blerjet e Nico Schulz, Thorgan Hazard dhe Julian Brandt në merkaton e kësaj vere pasi synon të afrojë të tjerë lojtarë me peshë për të ndërtuar një skuadër që mund të thyejë hegjemoninë 7-vjeçare të vendosur nga Bayern Munich, vitin tjetër. Pas 3 lojtarëve kualitativë dhe të rinj në moshë të afruar në harkun e dy ditëve, drejtuesit e klubit verdhezi po projektojnë një tjetër blerje. Këtë herë bëhet fjalë për një lojtar me një eksperiencë shumë të madhe dhe që e njeh shumë mirë kampionatin gjerman pasi në të shkuarën ka mbajtur veshur fanellat e Wolfsburg dhe Bayern Munich. Bëhet fjalë për sulmuesin 33-vjeçar të Juventusit, Mario Mandzukic për kartonin e të cilit drejtuesit e Dortmundit janë gati të ofrojnë deri në 15 milionë euro. Një shifër kjo që mund të bindë Juventusin të lërë të lirë kroatin që sapo ka rinovuar kontratën me bardhezinjtë.