Xhaka flet për Ronaldon, pasi gabimi i tij ia dha portugezit het-trikun

Futboll

Xhaka flet për Ronaldon, pasi gabimi i tij ia dha portugezit het-trikun

Më: 6 qershor 2019 Në ora: 15:38
Ronaldo dhe Xhaka

Granit Xhaka pretendon se nuk ke çfarë të bësh për ta ndalur Cristiano Ronaldo, pasi e bëri gabimin që ia dha portugezit golin e het-trikut në ndeshjen kundër Zvicrës në gjysmëfinale të Ligës së Kombeve, të cilën Portugalia e fitoi me rezultat 3:1.

Ronaldo shkëlqeu duke i shënuar tri gola ndaj Zvicrës së Xherdan Shaqirit dhe Granit Xhakës në gjysmëfinalen e zhvilluar të mërkurën mbrëma në Porto, dhe e bëri Portugalinë kombëtaren e parë finaliste në garën e re të UEFA-s.

Zvicra, për të cilën dy shqiptarët Shaqiri dhe Xhaka luajtën 90 minuta, do të luajë për vendin e tretë të dielën. Ndërsa, Portugalia do ta presë fituesin e gjysmëfinales së dytë mes Holandës dhe Anglisë, në finalen e së dielës.

“Jam me të vërtetë krenar për paraqitjen tonë dhe zhvillimin që po e bëjmë. Nganjëherë nuk ke çfarë bën kur Ronaldo e shënon një het-trik aq të veçantë”, shkroi Xhaka në llogarinë e tij në Instagram.

Një pjesë të parë të kontrolluar nga vizitorët, e fitoi Portugalia falë Ronaldos. Superylli i Juventusit realizoi një gol fantastik nga gjuajtja e lirë në minutën e 25-të.

Zvicra, megjithatë, pati një fillim premtues në pjesën e dytë dhe e barazoi rezultatin në 1:1. Mbrojtësi Rodrigo Rodriguez shënoi nga penalltia, e cila erdhi vetëm falë VAR-it në minutën e 57-të.

Në një kohë kur u mendua se koha shtesë apo penalltitë do ta vendosnin finalistin e parë, Ronaldo doli në skenë si gjithmonë.

Dy minuta para fundit, Ronaldo e ktheu epërsinë e portugezëve duke realizuar pas një super pasimi nga Bernardo Silva. Vetëm dy minuta më vonë, një top i humbur nga Xhaka në mesfushë e fundosi Zvicrën.

Portugalia doli në kundërsulm të shpejtë, të cilin e konkretizoi me gol Ronaldo, i cili e kompletoi het-trikun duke shënuar një gol të bukur.

commentFirst article
Sot mund të lexoni Shfletoni kopertinat