Gazeta e madhe sllovene: Arritja historike në Sofje e Kosovës së rilindur

Futboll

Gazeta e madhe sllovene: Arritja historike në Sofje e Kosovës së rilindur

Më: 12 qershor 2019 Në ora: 17:07
Foto ilustrim

Gazeta e përditshme me ndikim në Slloveni “Dnevnik” e ka quajtur historike fitores dramatike me rikthim të Kosovës ndaj Bullgarisë të hënën në Sofje, duke e përshkruar ekipin kombëtar verdhekaltër si të rilindur.

Kosova iu gëzua fitores së parë në një fushatë kualifikuese për Kampionatin Evropian falë një goli të vonshëm nga Elbasan Rashani duke e mundur 3:2 Bullgarinë të hënën në Sofje.

Triumfi ndaj bullgarisë nënkupton se Kosova, e renditur në vendin e tretë, tani ngel vetëm një pikë prapa lideres së Grupit A kualifikues, Anglisë, dhe vendit të dytë, Republikës së Çekisë.

Gazeta sllovene beson se Bernard Challandes e ka kthyer një faqe të re dhe e la rilindur ekipin kombëtar dardan në vitin e fundit. Menjëherë pas pranimit në UEFA dhe FIFA më 2016, Kosova mori pjesë në kualifikime për Kampionatin Botëror 2018, duke dështuar të fitojë në 10 ndeshje sa i luajti (9 humbje dhe 1 barazim).

Por, me ardhjen e Bernard Challandes në postin e trajnerit, verdhekaltrit nuk e humben asnjërën nga 14 ndeshjet nën urdhrat e tij. Trajneri zviceran i ndihmoi “Dardanëve” ta fitojnë Grupin në Ligën D të Ligës së Kombeve dhe të promovohen në Ligën C pa pësuar humbje.

Në tri ndeshjet e para në kualifikime për EURO 2020, Kosova e ka një fitore dhe dy barazime.     

“Sensacioni i natës (hënën) ishte ekipi kombëtar i Kosovës, i cili e befasoi Bullgarinë duke e mundur 3:2 në Sofje, duke e regjistruar fitoren e parë historike në kualifikime. Të rinjtë e vendit më të ri evropian nuk e shënuan asnjë fitore në kualifikime për Kupën e Botës, por tani ata e kanë kthyer një faqe dhe luajtën si të rilindur”, shkruan Dnevnik për Kosovën.

Dnevnik e vazhdon shkrimin: “Në Ligën e Kombeve, ata e arritën nivelin më të lartë të cilësisë. Pas suksesit në Bullgari, ata janë në një seri prej 14 ndeshjeve pa humbje”. 

commentFirst article
Sot mund të lexoni Shfletoni kopertinat