Kosova është në qendër të vëmendjes në opinionin ndërkombëtar, sepse me rezultatet që po shënon në Grupin A të kualifikueseve për Kampionatin Evropian 2020, shumëkënd e la pa fjalë. Kur ishte hedhur shorti, pakkush kishte besuar se Kosova për tri ndeshje do të ketë pesë pikë, veçmas t’i importon 4 pikë nga jashtë.
Barazimi 1:1 në hapje me Bullgarinë në stadiumin “Fadil Vokrri” me shumë ka qenë fat sportiv për bullgarët se sa që merituan pikë, pastaj në Podgoricë luajtën baras (1:1) dhe me 10 qershor shënuan fitoren e parë historike me 3:2 kundër Bullgarisë në kualifikimet e Kampionatin Evropian 2020, aq më bukur në stadiumin “Vasil Levski” në Sofje. Fitore që bëri bujë të madhe dhe për 28 minutat pjesë e kësaj fitore të madhe ka qenë edhe mesfushori Anel Rashkaj, dikur kapiten i kombëtares. Ai pas një kohe u rikthye me sukses në Kombëtare dhe tregoi lojë shumë të mirë kundër Bullgarisë, duke marrë komplimente të mëdha.
“Bota sot”: Pas një kohe të gjatë u kthyet në Kombëtare, në dy ndeshje fituat katër pikë në udhëtim, 1:1 me Malin e Zi dhe e mundët me 3:2 në Sofje Bullgarinë?
Anel Rashkaj: Mendoj se arritëm rezultate shumë të mira dhe kanë qenë shumë me meritë këto pikë. Ekipi ka bërë paraqitje shumë të mira.
“Bota sot”: A ishe i emocionuar kur u kthyet pas një kohe?
Anel Rashkaj: Po. Është kënaqësi e madhe të luash për përfaqësuesen. Të luash për shtetin tënd padyshim se është krenari, kur i shtohen edhe rezultatet e mira që po e bëjnë krenarë gjithë popullin.
“Bota sot”: A mendoni se është një kombëtare që do të bëj gjëra të mëdha?
Anel Rashkaj: Nuk mund të themi që do të bëjmë gjëra të mëdha, por duhet të punojmë në at drejtim që të bëjmë gjëra të mëdha. Jemi kombëtare e re, shumë luftarake dhe po japin secili më të mirën e mundshme, si fryt i kësaj po vijnë edhe rezultatet.
“Bota sot”: Kosova është në grup të fortë me Anglinë, Çekinë, Malin e Zi dhe Bullgarinë, a mendoni se do të jetë kandidate për dy vendet e para?
Anel Rashkaj: Të shohim, ka ende kohë, por duhet të marrim një nga një ndeshjet.
“Bota sot!”: Kosova në muajin shtator ka dy ndeshje të mëdha, së pari e pret (me 7 shtator) Çekinë dhe pastaj i shkon (me 10 shtator) Anglisë, a janë sfida emocionale?
Anel Rashkaj: Normalisht se janë sfida emocionale dhe shumë të vështira. Çdo pikë që e fitojmë është e mirëseardhur për ne.
“Bota sot: Në Suedi, AFC Eskilstuna nuk po kalon formë të mirë, a mendoni se do të ikni nga fundi i renditjes?
Anel Rashkaj: Po, është e vërtet, po mund të ikim por për mu është me rëndësi ta jap maksimumin tim, ta kryej detyrën time, pastaj të shohim sepse kontrata me skadon në nëntor. E imja të angazhohem e të jap më të mirën për rezultate sa më të mira.
“Bota sot”: A jeni në formën më të mirë?
Anel Rashkaj: Për momentin jam në formë të mirë! Po punoj me përkushtim që jem në nivel edhe më të mirë të mundshëm.
“Bota sot”: Cilat janë synimet tuaja për këtë vit?
Anel Rashkaj: Synimet janë që të paraqitem sa më mirë, që të dal me një ekip më të mirë dhe të jem në formë të mirë.