Argjentina e ka nisur me humbje fazën grupore të turneut Copa America. Albicelestët pësuan me rezultat 2-0 nga Kolumbia në ndeshjen e parë të Grupit B të zhvilluar në Arena Fonte Nova në Salvador të Brazilit.
Wilmar Barrios pati një nga rastet e para pas gjysmë ore lojë për Kolumbinë, mirëpo topi i tij u bllokua. Menjëherë pas, pati një moment të dyshimtë penalltie për kolumbianët, mirëpo gjyqtari me ndihmën e sistemit VAR vendosi se nuk ishte penallti.
Një tjetër mundësi për Kolumbinë iu dha Radamel Falcaos, por goditja e tij me kokë shkoi mbi portë.
Në fillim të gjysmës së dytë, Leandro Paredes pati një rast për t’u përmendur për argjentinasit, ndërsa më pas David Ospina intervenoi për mrekulli në goditjen e German Pezzellas.
Ospina bëri një tjetër pritje të mirë në rastin e Nicolas Otamendit, ndërsa një mundësi të mirë e humbi edhe Lionel Messi.
Rezultati u zhbllokua në minutën e 71-të, ndërsa shënoi Kolumbia. Një angazhim individual i Roger Martinez, rezultoi me golin e epërsisë.
Fitoren e vulosi Duvan Zapata (86’), i cili reagoi më mirë në zonë pas një harkimi të ulët nga Jefferson Lerma. Kështu, Kolumbia arkëtoi tri pikë dhe qëndron në krye të grupit.
Për herë të fundit, Argjentina e ka fituar këtë trofe në vitin 1993, ndërsa Leo Messi i ka humbur tri finale (2007, 2015 dhe 2016) dhe përpjekjet e tij për të fituar trofe me kombëtaren po vazhdojnë.
Paraguai dhe Katari janë dy përfaqësueset tjera që bëjnë pjesë në Grupin B, ndërsa akoma nuk e kanë zhvilluar takimin e parë.
Kualifikimin direkt e sigurojnë dy skuadrat e para në grup, ndërsa kualifikohen edhe dy kombëtare me pozicionim më të mirë në vend të tretë nga të gjitha grupet.
