Polonia ka mposhtur Italinë në ndeshjen e dytë të fazës së grupeve të Europianit U-21 me rezultatin 1-0 dhe mbetet në krye të grupit me pikë të plota.
Të dyja skuadrat e kanë nisur turneun me fitore ditën e diel, Azzurri ka fituar 3-1 ndaj Spanjës teksa Polonia ka mposhtur Belgjikën 3-2.
Vendasit kishin mundësi që në fillim me Orsolini, Cheisa dhe Pellegrini që i janë afruar shumë golit, ndërsa Mandragora duhet të kishte shënuar në rastin e tij.
Italia ka dominuar plotësisht pjesën e parë, ndërsa polakët me shumë fat kanë shënuar pak minuta para se skuadrat të riktheheshin në dhomat e zhveshjes.
Ishte pikërisht Bielik ai që ka gjetur rrjetën në minutën e 40’ të takimit pas goditjes së bukur në hyrje të zonës.
Edhe pas pushimit italianët u munduan të gjenin të paktën golin e barazimit, por polakët kanë luftuar me mish e me dhëmbë për të ruajtur këtë fitore të madhe.