Ani pse e ka përfunduar karrierën e tij, vazhdon të mbetet njëri prej futbollistëve që ka lënë gjurmë të pashlyeshme.
Paolo Cesare Maldini, quhet njeriu që i ka fituar pesë Liga të Kampionëve, ku vetëm Real Madridi e Liverpooli kanë më shumë se ai.
Ish kapiteni i Milanit dhe kombëtares italiane sot feston 51 vjetorin e lindjes, derisa sot poashtu, është mbyllur një sondazh sa i përket asaj se kush është mbrojtësi më i mirë në histori.
Në faqen zyrtare të sajtit sportiv “SportBible”, votuan afro 30 mijë tifozë, teksa mes Carles Pyuol, Cannavaros, Sergio Ramos e Maldinit, ky i fundit u shpall fitues me mbi 64% të votave.
Kujtojmë se gjatë karrierës, legjenda “kuq e zi” pati 902 paraqitje me Rossonerët, derisa fitoi 26 tituj, në 25 sezone. Në 126 paraqitje ndërkaq, ai mbajti me krenari shiritin e kapitenit të përfaqësueses azzure, fituesen e katërfishtë të kampionatit botëror.
