Sarri e komenton mundësinë e transferimit të Pogbas në Juventus - Bota Sot
Sarri e komenton mundësinë e transferimit të Pogbas në Juventus

Futboll

Sarri e komenton mundësinë e transferimit të Pogbas në Juventus

Më: 20 korrik 2019 Në ora: 14:14
Paol Pogba

Trajneri i Juventusit, Maurizio Sarri, e ka konfirmuar se i pëlqen shumë mesfushori i Manchester Unitedit, Paul Pogba, mirëpo ka shtuar se ai është pjesë e skuadrës së “Djajve të kuq” dhe se nuk është në njohuri për situatën e tij.

Fituesi i Kupës së Botës me Francën e la Juventusin për 105 milionë eurot e ofruara nga Manchester Unitedi në vitin 2016, kur u bë lojtari më i shtrenjtë në histori. Mirëpo, që nga atëherë ai e ka fituar vetëm një trofe të League Cup dhe një të Ligës së Evropës.

Pogba është përfolur për një kthim të mundshëm të Torino dhe trajneri i ri i Juventusit, Maurizio Sarri, u pyet për francezin gjatë konferencës së tij për shtyp para ndeshjes kundër Tottenhamit, në Singapor.

“Më pëlqen me të vërtetë Pogba. Megjithatë, ai është lojtar i Manchester Unitedit. Unë nuk jam drejtori sportiv, kështu që nuk e di situatën e tij”, ka thënë Sarri.

Pas disa javësh raportime se Juventusi dhe Real Madridi duan t’i sigurojnë shërbimet e Paul Pogbas për sezonin e ardhshëm, kampioni italian u raportua se e bëri gati një ofertë për “Djajtë e kuq”. E përditshmja italiane, Corriere della Sera, raporton se Juventusi i ka zgjedhur tre lojtarë të skuadrës për ta ulur çmimin që Manchester Unitedi po e kërkon për fituesin e Kupës së Botës, 150 milionë funte.

Drejtuesit e Juventusit besojnë se ata mund ta bindin Manchester Unitedin ta shesë Pogban këtë afat kalimtar të verës, përkundër insistimit të anglezëve se francezi nuk është për shitje dhe është pjesë e rëndësishme e skuadrës së tyre për sezonin e ardhshëm.

Vetë Paul Pogba e kishte bërë të ditur dëshirën e tij për t’u larguar nga Manchester Unitedi gjatë këtij afati kalimtar të verës, gjatë kohës sa ishte me pushime në Kinë, transmeton Gazeta Express.

“Mendoj se, për mua, kjo mund të jetë koha e duhur për ta pasur një sfidë të re diku tjetër”, kishte thënë ylli francez.

Pastaj, në fillim të këtij muaji, agjenti i Pogbas, Mino Raiola, tha se ai është në proces për t’ia gjetur një klub të ri klientit të tij, pas lajmeve se Real Madridi dhe Juventusi janë të interesuar për 26-vjeçarin.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...