E ardhmja e sulmuesit uellsian Gareth Bale është ende një enigmë. Te Real Madrid nuk e duan më, ndaj dhe janë duke u përpjekur t’i gjejnë një skuadër të re. Mes ekipeve kandidate për të marrë sulmuesin 30-vjeçar është edhe Bayern Mynih, që kërkon një lojtar të fortë në sulm.
Gjatë konferencës së sotme për shtyp ka folur trajneri Niko Kovac, që u shpreh me superlativa për lojtarin uellsian. Një sinjal ky, që Bale mund të transferohet te Bayern sezonin tjetër, ndoshta në formë huazimi, ashtu sikurse dy klubet vepruan me James Rodriguez.
“Më dëgjoni se çfarë do të them. Gareth Bale është një lojtar i madh, ashtu sikurse janë të jashtëzakonshëm lojtarë të atij kalibri. Gjithsesi, ajo që unë nuk di është nëse ai ka dëshirë të luajë në një ekip tjetër përveç Real Madrid dhe nëse do të ketë po kaq shumë sukses. Këtë nuk me parashikoj dot, por këtu është i mirëpritur”, tha Kovac.
Bale ka një kontratë deri në vitin 2022 me skuadrën madrilène, ekip me të cilin luan që prej vitit 2013, kur u transferua nga Tottenham për 100 milionë euro.
