Në përfundim të ndeshjes së fituar kundër yjeve të MLS-së, trajneri i Atletico Madrid, Diego Simeone, ka komentuar paraqitjen e lojtarëve të tij dhe gjendjen e skuadrës. Siç ka bërë të ditur "Mundo Deportivo", trajneri i madrilenëve ka folur edhe për merkaton.
Fitorja 3-0 e ka kënaqur argjentinasin: "Jam argëtuar, kemi treguar gjera të mira. Në pjesën e parë kemi kaluar në avantazh dhe në të dytën jemi mbrojtur mirë kur kundërshtari ka shkuar afër golit të barazimit".
"Këto ndeshje na shërbejnë për të përmirësuar gjendjen e skuadrës. Jam i kënaqur për të rinjtë. Joao Felix po përmirësohet, ashtu si Hermoso, nuk është e lehtë të përshtatesh me të rinjtë, duhet të jemi të bashkuar në prag të sezonit që na pret, do të jetë e vështirë".
Në lidhje me blerje ose shitje të tjera të mundshme: "Nuk ka qetësi deri në mbylljen e merkatos. Gjithçka mund të ndodhë. Nuk kemi një organikë shumë të kompletuar për momentin. Ka lojtarë të rinj në ekipin e parë dhe për këtë arsye duket e kompletuar, por nuk është. Do të presim fundin e merkatos për të parë kush vjen dhe kush do të marrë vendin e atyre që mund të largohen".
Në fund, një koment për Joao Felix: "I ngjashëm me Cristiano Ronaldo-n? Nuk shikoj asnjë ngjashmëri", ka thënë shkurt Simeone.