Portieri i Manchester City, Ederson Moraes, ka zbuluar një rast interesant kur kishte nervozuar trajnerin Pep Guardiola.
Në vitin 2018, Ederson i kishte kërkuar trajnerit Guardiola që të merrte përsipër ekzekutimin e penalltisë dhe kjo gjë e kishte nervozuar pa masë trajnerin spanjoll, Guardiola.
Sipas portierit, gjithçka kishte ndodhur gjatë një ndeshje ku City udhëhiqte 5:1, dhe tifozët brohorisnin emrin e tij për të ekzekutuar penalltinë, para se Gabriel Jesus të afrohej tek topi.
Me të dëgjuar zërat, portieri i kishte kërkuar trajnerit që të ekzekutonte penalltinë dhe kjo gjë nuk i kishte pëlqyer aspak Pepit.
“Një herë, ne ishim në epërsi 5:1 –mendoj- dhe tifozët kërkonin që unë të gjuaja penalltinë. Unë thash se kisha dëshirë dhe do ta shënoja atë penallti. Guardiola ishte shumë i nervozuar” ka thënë Ederson.
Tutje, braziliani ka lënë të kuptohet se Jesus kishte gabuar nga pika e bardhë, por Bernardo Silva kishte shtyrë topin në rrjetë.
