Statistikat historike thonë se spektatori mund të presë të shohë, në secilin derbi, 2.68 gola. Këtë herë, megjithatë, mesatarja mund të bjerë pak, sipas "implikimeve" të tjera.
Mbrëmjen e kësaj të shtune përballen dy mbrojtjet më të mira të këtij kampionati, me vetëm nga një gol të pësuar. Mbrojtja, ose të paktën faza e mbrojtjes, vazhdon të jetë krenaria e Milanit. Më 2019, të marrë si një vit kalendarik, kuqezinjtë janë skuadra e Serie A, që ka pësuar më pak gola: 17 në 22 ndeshje.
Nga këto 22 ndeshje, në 10 raste porta mbeti e paprekur. Kjo shifër, gjithashtu, përbën një rekord. Në këtë pjesë të parë të kampionatit, mirësia e fazës mbrojtëse konfirmohet edhe nga një e dhënë tjetër: Milani është skuadra që ka marrë më pak goditje në portë: 8 të tilla në 270 minuta lojë.
Pra, “diga” kuqezi e mban kundërshtarin lart. Në projektet e Interit, mbrojtja ka qenë gjithmonë baza, nga e cila duhet të fillojë ndërtimi i një ekipi fitues për këtë sezon.
Ardhja e Diego Godin dhe dueti De Vrij-Skriniar (GDS) përbëjnë një treshe, që në letër mund të garojë me më të mirët në kontinent. Goli i vetëm i këtij fillimkampionati është pësuar nga Udinese. Derbi kundër Milanit, megjithatë, do të jetë testi i parë i vërtetë për GDS, por edhe një provë apeli, pas hezitimit në Champions. Cilësitë e këtij reparti zikaltër nuk diskutohen, por mekanizmat duhen vajisur…