Ondrej Kolar ishte padyshim njeriu i mbrëmjes së kaluar në sfidën mes Barcelonës dhe Slavias së Pragës. Portieri çek u shndërrua në hero për ekipin e tij, teksa ndali çdo top që vinte drejt portës, me Slavian që mori një barazim 0-0 në mitikun “Camp Nou”.
Pas ndeshjes, portieri Kolar ka folur për mediat, ku është shprehur jo shumë i lumtur për sjelljen e disa prej lojtarëve katalanas. Gardiani i Slavias veçon vetëm Ter Stegen, i cili i kishte bërë shumë komplimenta, ndërsa për pjesën tjetër, ai shprehet se nuk i kanë shtrënguar as duart.
“Ter Stegen po më priste në tunel, që është diçka shumë e madhe për mua. Të dëgjoj komplimente nga një portier i tillë të jep ndjesi fantastike. Ishte eksperiencë fantastike, por disa nga lojtarët e tjerë... Messi dhe të tjerët thjesht u larguan, madje disa prej tyre nuk shtrënguan as duart me ne. Ishte diçka e shëmtuar. Ne takuam lojtar të mëdhenj dhe donim të shkëmbenim fanellat, por ata nuk u sollën mirë.”
