Me përballjen e nesërme për Kupë, zyrtarisht bije perdja e futbollit për vitin 2019. Prishtina, edhe pse teknikisht është mysafire, e pret skuadrën e Arbërisë nga Dobraja në kuadër të 1/8 së finales.
Arbëria nga Dobraja (Lipjan) është nënkampione vjeshtore e Ligës së parë, me 27 pikë të tubuara (7-6-3, 29:22), vetëm një më pak se kampionët e Besës së Pejës.
Arbëria në Rrethin e dytë apo në 1/16 e finales kishte eliminuar Onixin nga Banja e Pejës (1:0), ndërsa Prishtina Minatorin e Magurës (4:0).
Bardhekaltrit përveç Leonit Abazit të lënduar, nuk kanë mungesa tjera dhe pritet të paraqitet përbërja më e mirë momentale.
Arbëria - Prishtina
E diel, 8 dhjetor - ora: 12.30
Stadiumi “Fadil Vokrri”, Prishtinë (Hapet tribuna perëndimore - pa pagesë)
Gjyqtarë: Shpëtim Murtezi, Fatlum Jashari, Faton Jakupi - Valbon Hoxha (Gjilan)
E. Haxho: Duhet të japim maksimumin të fitojmë ndeshjen, bëhet e ditur nga FC Prishtina.
“E di që fillimin te Prishtina e kisha pak të vështirë.
Kisha marrë formën, isha aktivizuar në ndeshjet miqësore, por pastaj e kisha një dëmtim të gishtit që më mbajti larg formës dhe normalisht duhej pranuar edhe stolin. Përveç kësaj gjithçka ka shkuar mirë për mua, shto faktin që unë jam i një natyre që shkrihem në grupin apo me të gjithë bashkëlojtarët, si tek ai më i riu 17-18 vjeçari apo te ai më i vjetri apo edhe i karaktereve të ndryshme. Prishtina ka grup të mirë të djemve, kjo më ka ndihmuar edhe që të kaloja sa më mirë kohën gjatë lëndimit duke e gjetur mbështetjen të gjithë çunave në skuadër.
Ndërsa do të jetë kjo ndeshja ime e dytë dhe unë gjithmonë mundohem të jap maksimumin, si për Kupë si për kampionat apo për çfarë do lloj synimi që ka ekipi.
Arbërinë e njohim shumë pak, por kemi marrë informacionet e duhura dhe dimë që gjatë gjithë kohës kanë qenë mirë në klasifikim duke e pasur një grup të konsoliduar dhe duke e marrë parasysh që ndeshja luhet në “Fadil Vokrri”, normalisht që duan edhe të shfaqen apo të tregohen. Pra, na duhet të japim maksimumin të fitojmë ndeshjen dhe të kalojmë tutje.