Milot Rashica po tregon një formë të shkëlqyer te Werder Bremen, teksa me paraqitjet e tij ka tërhequr vëmendjen e ekipeve të mëdha.
Një nga klubet që interesohet për të marrë shërbimet e sulmuesit të Kosovës, është Liverpooli. Thuhet se lojtari pëlqehet shumë nga trajneri Jurgen Klopp, i cili e do atë në skuadrën e tij.
Shuma që anglezët duhet të derdhin në arkat e Werderit është 38 milionë euro, një shumë kjo e përballueshme për kampionët e Evropës në sezonin e kaluar.
Megjithatë përveç Werderit, një shumë të majme nga ky transferim do të fitonte edhe Vushtrria, ekip ku Rashica qëndroi nga 2010 deri në 2015.
Me rregullat e FIFA-s, skuadra që e rrit lojtarin merr 5 për qind të çdo transferimi të futbollistit dhe në këtë situatë Vushtrria do të merrte rreth 1.9 milion euro, duke u bërë kështu në një nga klubet më të qëndrueshme financiarisht në Kosovë.
