Federata e Futbollit e Kosovës në bashkëpunim me Shoqatën e Trajnerëve e ka organizuar seminarin njëditor për trajnerë dhe drejtor sportivë të klubeve. Në këtë seminar, i cili u mbajt, sot, në hotel “Emerald” ka ligjëruar trajneri i njohur gjerman, Thomas von Heesen, derisa atij i ka asistuar ish-futbollisti i mirënjohur shqiptar, Fatmir Vata.
Kryetari i Shoqatës së Trajnerëve të Futbollit të Kosovës, Muharrem Sahiti, e vlerësoi si seminar shumë të frytshëm. “Seminar shumë i suksesshëm, hera e parë si kryetar i shoqatës, duke na mbështetur federata, ku patëm në seminar Thomas von Heesen, emër i madh i futbollit gjerman, me një përvojë të jashtëzakonshme si futbollist, mbi 500 lojë dhe si trajner në Bundesliga në disa klube, edhe drejtor sportiv në disa klubet gjermane. Për gjithë ne ka qenë i frytshëm dhe kemi marr shumë informata dhe përvojës tij”, tha Sahiti për gazetën kombëtare “Bota sot”.
Ky seminar u organizua në kuadër të bashkëpunimit të ngushtë me Federatën e Futbollit të Gjermanisë (DFB) dhe përkrahjen e përfaqësuesit të FFK-së në Gjermani, Fekmi Kongjeli. Në hapje të këtij seminari ishin të pranishëm edhe presidenti Agim Ademi dhe sekretari i përgjithshëm Eroll Salihu, të cilët falënderuan trajnerin gjerman dhe DFB-në për ndihmën që po i japin FFK-së në çdo segment, derisa të pranishmit dhe mysafirët nga Gjermania i përshëndeti edhe kryetari i Shoqatës së Trajnerëve, Muharrem Sahiti.
Gjatë këtij seminar ish-futbollisti dhe ish-trajneri i Hamburgut dhe Arminia Bielfeldit para trajnerëve kosovarë e ka shpalosur përvojën e tij në klubet ku ka punuar, duke dhënë instruksione të rëndësishme për një punë sa më të suksesshme si trajner. Ai ka folur për rolin e trajnerit, për detyrat që një trajner duhet t’u japë futbollistëve, për mënyrën e përgatitjes së ekipit gjatë javës para një ndeshjeje, për përzgjedhjen e lojtarëve, si dhe për sistemin e lojës. Po ashtu, trajneri gjerman Thomas von Heesen ka bërë edhe një krahasim të futbollit në të kaluarën dhe atij të ditëve të sotme, duke e ndërlidhur me shembuj konkret nga puna e tij në klubet gjermane, por edhe në vende më të vogla si tek Limasol në Qipro.
Ndërkohë, këtë seminar me përvojat e tij e ka pasuruar edhe ish-futbollisti i Kombëtares Shqiptare, Fatmir Vata, që po ashtu ka rrëfyer momente të rëndësishme nga karriera e tij pikërisht në raportet futbollist-trajner. Sipas Von Heesen është me rëndësi që trajneri t’i përshtatet vendit dhe kampionatit ku punon për të pasur sukses.
Ai ka thënë se kudo që shkon një trajner duhet ta ketë parasysh që të ketë respekt maksimal për qytetin, për klubin, për tifozët, por edhe për punëtorin më të rëndomtë në stadium, ngase kjo është mënyra e duhur që të arrihet suksesi. Tutje, ai ka folur edhe për raportet trajner-lojtarë, me ç’rast ka inkurajuar trajnerët kosovarë që të gjejnë mënyrën e duhur që nga futbollistët të nxjerrin maksimumin.
Në fund, ai ka kërkuar nga trajnerët që të tregohen të guximshëm, të tregojnë integritet në punën e tyre dhe mos të lejojnë përzierjen e kryesive të klubeve në punën e tyre.
