Selektorit të Kombëtares së Kosovës, Bernaard Challandes, po i mungon futbolli, por zvicerani 68-vjeçar assesi nuk rri larg tij. Challandes ditët e karantinës shkaku i pandemisë së koronavirusit, po i kalon në shtëpinë e tij në La Chaux-du-Milieu, në Zvicër.
“Natyrisht se më mungon futbolli. Por unë dhe familja ime jemi mirë. Më vjen keq vetëm që nuk mund të shoh nipërit e mi”, ka thënë Challandes për Aargauer Zeitung.
Tekniku zviceran ka thënë se aktualisht po i studion goditjet standarde, derisa shtyrjen e ndeshjeve po e shfrytëzon për t’u përgatitur edhe më shumë. Idetë e tij ua përcjell futbollistëve, me të cilët mbanë kontakt nëpërmjet telefonit.
“Nuk është situatë e lehtë në Kosovë”, ka thënë Challandes duke folur për pandeminë, por edhe për zhvillimet politike në vend. “Do të ishte shumë më mirë sikur ekipi kombëtar i futbollit do të bënte njerëzit të lumtur duke u kualifikuar në Evropian”.
Kosova është dy fitore larg Evropianit, derisa UEFA nuk ka njoftuar se kur do të luhen ndeshjet e play-offit. Takimi me Maqedoninë e Veriut fillimisht ishte shtyer për fillimin e muajit qershor, kurse tashmë është shtyer në afat të pacaktuar.
Sipas Bernard Challandes, takimi i radhës i Kosovës nuk është në horizont.
“Supozoj se ndeshjen e play-offit do ta luajmë në nëntor”, ka thënë ai.
Rreth gjendjes shëndetësore të Challandesit, ditën e djeshme kishte folur edhe presidenti i FFK-së, Agim Ademi.
