Mesazhi i fuqishëm i Boateng kundër racizmit: Shumë futbollistë kanë frikë ta ngrenë zërin - Bota Sot
Mesazhi i fuqishëm i Boateng kundër racizmit: Shumë futbollistë kanë frikë ta ngrenë zërin

Futboll

Mesazhi i fuqishëm i Boateng kundër racizmit: Shumë futbollistë kanë frikë ta ngrenë zërin

Më: 3 qershor 2020 Në ora: 21:37
Kevin-Prince Boateng

Kevin-Prince Boateng e ka dhënë një mesazh të fuqishëm kundër racizmit, duke iu bërë thirrje futbollistëve për të marrë qëndrim, sepse beson se shumë prej tyre kanë frikë ta bëjnë një gjë të tillë.

Boateng e kishte braktisur fushën në shenjë proteste kur e kishin abuzuar në baza raciste gjatë një ndeshje miqësore për Milanin në Itali në vitin 2013, dhe që prej atëherë ka qenë shumë i zëshëm në luftë kundër racizmit në sport.

Ish-futbollisti i Barcelonës, që tani luan te Fiorentina në Serie A, e ka rinuar zotimin për t’i prirë luftës kundër racizmit, pasi George Floyd, një afro-amerikan 46-vjeçar, vdiq pasi një polic i bardhë e shtypi me gju në qafë për disa minuta në Minneapolis të SHBA-së më 25 maj.

Vrasja e Floyd ka nxitur protesta të ashpra në SHBA dhe nëpër botë, përfshirë në Britani të Madhe, Gjermani, Zelandë të Re, Francë dhe Danimarkë.

Në një intervistë për Sky Sports pas protestave, Boateng ka thënë: “Shoqëria duhet të jetë proaktive jo reaktive. Disa lojtarë kanë frikë të flasin. Racizmi duhet të mësohet në shkolla.”

I pyetur si e ka përjetuar vdekjen e Floyd, ai shtoi: “Është një situatë e vështirë. Përveç se jam i trishtuar, jam edhe i zemëruar. Të dhemb kur duhet gjithmonë të kthehesh te ndjesia e njëjtë. Po e kam shumë të vështirë tani”.

I pyetur se si po e trajton futbolli këtë çështje, Boateng nënvizoi: “Çfarë po bën futbolli në përgjithësi? Jo shumë. Një reklamë në TV apo një baner kur ekipet futen në fushë nuk mjaftojnë. Është vonë tashmë, por kurrë nuk është tepër vonë. Duhet thjesht të zgjohemi nga gjumi”.

Në lidhje me momentin e vitit 2013 kur u abuzua vetë, Boateng theksoi: “Nuk jam qyqar më. Ai ishte momenti kur u ngopa, u bë mjaft. U ndjeva i trishtuar, i zemëruar, e urreja botën. Desha t’i tregoj botës se nuk do t’i lë ata të ma bëjnë këtë më. Pas asaj që e përjetova, pas gjithë atij flijimi. Nuk do të më gjykoni për shkak të lëkurës sime”.

Shfaq komentet
comments powered by Disqus
Sot mund të lexoni Shfletoni kopertinat