David Moyes e ka mbrojtur rekordin e vet si trajner i Manchester Unitedit, duke insistuar se dallimi i vetëm mes tij dhe trajnerit aktual, Ole Gunnar Solskjaer, është se klubi po i jep kohë norvegjezit.
Skocezi David Moyes u zgjodh për ta zëvendësuar ish-trajnerin legjendar Sir Alex Ferguson në Old Trafford në fund të sezonit 2012/13, pas 11 vjetëve të suksesshme në Everton.
Trajneri skocez e trashëgoi një skuadër të Djajve të Kuq që sapo e kishte fituar titullin e Premierligë, mirëpo nuk arriti ta vazhdojë me të njëjtin hap rrjedhën e rezultateve dhe u shkarkua vetëm pas 10 muajve në postin e trajnerit.
Kur Moyes u shkarkua, Manchester Unitedi kishte rënë nga kampioni në fuqi në pozitën e shtatë në tabelë dhe me dallim të madh nga klubet në top katërshe të Premierligës për kualifikim në Ligën e Kampionëve.
57-vjeçari për momentin është duke punuar si trajner i West Hamit dhe të mërkurën do të përballet me Manchester Unitedit, të cilit i duhet fitorja për kualifikim në edicionin e ardhshëm të Ligës së Kampionëve.
Manchester Unitedi e ka pasur një ecuri mbresëlënës të ndeshjeve këtë vit dhe Moyes është i sigurt se ai mund t’i kishte arritur sukseset e njëjta si norvegjezi nëse do t’i ishte dhënë më shumë kohë nga klubi.
“Është një klub i mrekullueshëm dhe një vend brilant. Për mua është klubi më i madh në botë, pa asnjë dyshim. Është gjithmonë e veçantë të shkosh në atë vend dhe mezi po pres të kthehem”, ka thënë Moyes.
“Ole e pati një start të vështirë, por dallimi mes meje dhe atij është se atij po i jepet kohë. Ai po sjell lojtarë nga akademia, filozofi kjo në të cilën Manchester Unitedi ka besuar gjithmonë. Tani ata kanë lojtarë të rinj tejet premtues”.
