Krerët e FFK-së takohen me ministrin Zemaj, u diskutua për shkollat e futbollit - Bota Sot
Krerët e FFK-së takohen me ministrin Zemaj, u diskutua për shkollat e futbollit

Futboll

Krerët e FFK-së takohen me ministrin Zemaj, u diskutua për shkollat e futbollit

Më: 5 gusht 2020 Në ora: 16:57
Foto nga takimi

Presidenti i FFK-së Agim Ademi bashkë me sekretarin e përgjithshëm Eroll Salihu kanë takuar sot ministrin e Shëndetësisë, Armend Zemaj.

Gjatë këtij takimi krerët e FFK-së e njoftuan ministrin për situatën shëndetësore dhe nevojën për të filluar me stërvitje të gjitha kategoritë e futbollit, nga shkollat e futbollit e deri te klubet e të gjitha ligave dhe rangjeve, përfshirë edhe futbollin e femrave dhe futsallin.

Drejtuesit e FFK-së theksuan se është shumë e nevojshme që të fillojnë sa më parë stërvitjet përgatitore për kampionatin e ri, ngase garat planifikohet të fillojnë më 12 shtator, kurse ka mbetur shumë pak kohë për ekipet. Në fakt, janë vetëm 5 javë para fillimit të kampionatit, që është kohë jo e mjaftueshme për fazën përgatitore.

Gjatë këtij takimi me theks të veçantë u diskutua për shkollat e futbollit dhe nevojën për të stërvitur që të mos stagnohet me zhvillimin e kategorive të reja. FFK zotohet që do ta respektojë protokollin strikt për shëndetin e futbollistëve – shëndeti para të gjithave.

Në anën tjetër, ministri Zemaj tha se që nesër do ta mbledhë Këshillin për parandalimin e përhapjes së Covid-19 dhe do t’i konsultojë ata për të dhënë një vendim të shpejtë dhe të arsyeshëm, duke pasur parasysh rëndësinë e stërvitjeve, që futbollistët t’i mbajmë në formë.

Shfaq komentet
comments powered by Disqus
Sot mund të lexoni Shfletoni kopertinat