Sulmuesi i Përfaqësueses së Kosovës, Milot Rashica ka paralajmëruar rivalët e Moldavisë para takimit të sotëm (e enjte) në Ligën e Kombeve.
Kosova është ngritur nga Liga D në Ligën C të Ligës së Kombeve dhe në këtë edicion kualifikues për Kupën e Botës 2022 do të ketë kundërshtar më të fortë.
Dardanët e fillojnë sot kampanjën kualifikuese të edicionit të dytë në Ligën e Kombeve me një ndeshje në udhëtim ndaj Moldavisë.
Takimi është paraparë të zhvillohet me fillim nga ora 20:45 në Ennio Tardini të Parmas në Itali dhe dy ekipet janë gati.
Te Kosova ka një atmosferë të mirë para këtij takimit dhe këtë e ka treguar edhe sulmuesi vushtrrias, Milot Rashica.
Rashica ka shfrytëzuar rrjetet sociale, ku me një postim në mbrëmjen e së mërkurës ka treguar se janë gati për përballjen me Moldavinë.
“Gati për nesër”, ka shkruar Rashica në profilin e tij në Facebook, postim të cilit ia ka bashkangjitur edhe një fotografi.
Në Grupin 3 të Ligës C në Ligën e Kombeve, përveç Kosovës dhe Moldavisë marrin pjesë edhe Greqia dhe Sllovenia.
