FC Barcelona dhe Atlético Madrid kanë arritur marrëveshje për transferimin e sulmuesit Luis Suarez.
Kanë qenë të dyja klubet që kanë konfirmuar marrëveshjen, e që do t’i kushtojë Atletico Madridit vetëm 6 milionë euro.
“FC Barcelona dëshiron të shprehë publikisht mirënjohjen për Luis Suárezin, për angazhimin dhe përkushtimin e tij dhe i uron të gjitha të mirat për të ardhmen”, thuhet në njoftimin e klubit.
Luis Suarez ka fituar 13 tituj në gjashtë sezone me Barcelonën prej tyre: La Liga: 4, Liga e Kampionëve: 1, Copa del Rey: 4, Kupa Botërore e Klubeve: 1, Superkupë Evropiane: 1, Superkupë e Spanjës: 2.
Ai u bashkua me klubin blaugrana në verën e 2014 dhe bëri debutimin e tij kundër Real Madridit.
Suarez shënoi golin e tij të parë me Barcelonën në një fitore 4-0 në Ligën e Kampionëve ndaj APOEL , ndërsa golin e tij të parë në La Liga e shënoi kundër Cordobas në dhjetor.
Në gjashtë sezone si blaugrana, sulmuesi uruguaian shënoi 198 gola. Goli më i rëndësishëm te Barcelona ishte ai ndaj Juventusit në finalen e Ligës së Kampionëve.
Në vitin e tij të dytë në klub, sezoni 2015/16, ai fitoi “Këpucën e Artë” si golashënuesi më i mirë i Evropës, duke shënuar 40 gola në La Liga dhe 59 në total.
Ai po largohet nga Barcelona pasi kontribuoi 198 gola në 283 ndeshje, duke e bërë atë golashënuesin e tretë më të mirë në historinë e Barça,ndërsa ka kontribuar edhe me 97 asistime.
