Pozitiviteti i Zlatan Ibrahimoviç ndaj koronavirusit e privon Milanin nga lideri i vet në fillim të sezonit të ri. Një mungesë e rëndë, por që siç duket nuk do të ndryshojë planet e kuqezinjve. Paolo Maldini, i intervistuar nga “DAZN” para ndeshjes së “Europa League”, beson se Ibra do të kthehet në dispozicion të Pioli shumë shpejt:
“Ne mendojmë se Ibra do të jetë në dispozicion për shtatë ditë. Në ekipin e parë kemi mbajtur dy djem të rinj, të cilët janë Colombo dhe Daniel Maldini. Shpresoj ta bëjnë mirë pjesën e tyre. Ibra është mirë, është asimptomatik. Kuptohet, është një mungesë që peshon rëndë, e papritur. Ne kemi probleme në dy zona, midis mbrojtjes qendrore dhe përpara. Na vjen keq për Ibrën, ishte mjaft i karikuar. Shpresa e tij është që ta zhdukë sëmundjen sa më shpejt të jetë e mundur dhe të kthehet”.
Për momentin, pra, Milani mbështetet te Lorenzo Colombo, një djalë 18-vjeçar, tek i cili kuqezinjtë po ngulmojnë me vendosmëri: “Trajneri mendoi të flasë me ne. Djaloshi ka treguar se është gati, ai gjithmonë ka luajtur nën moshë. Colombo ka një rol shumë të rëndësishëm mbi supet e tij, ne nuk duhet të lejojmë që t’i peshojë aq shumë. Por, është normale të përballoni diçka, nëse doni të luani në “San Siro”, me Milanin”.
Maldini ia kushton fjalët e fundit merkatos. Mbi të gjitha, objektiv mbetet blerja e një mbrojtësi qendror: “Ne kemi ide të qarta. Gjithçka fillon nga besimi se ky është një ekip që po bën mirë. Gjithçka që do të bëhet do të jetë vetëm në funksion të përmirësimit”.