Leeds United ia doli të marrë fitoren e dytë radhazi në Premier League, pasi mposhti me rezultatin minimal 0-1 Sheffield United në transfertën e “Bramall Lane”.
Takimi ishte mjaft i luftuar nga të dy skuadrat, pasi Sheffield vinte pas dy humbjeve radhazi në dy javët e para të kampionatit dhe kërkonte pikët e para, ndërsa Leeds pati një epërsi të lehtë e cila u shpërblye dy minuta para fundit.
Kjo pasi Harrison dërgoi një krosim mjaft të mirë në zonë dhe aty sulmuesi kryesor i Leeds Patrick Bamford kërceu saktë me kokë dhe dërgoi sferën në rrjetë, duke shënuar golin me vlerë 3-pikëshe për të tijtë.
Ky është suksesi i dytë për skaudrën e drejtuar nga Marcelo Bielsa, që e nisi sezonin me një humbje ndaj kampionëve në fuqi të Liverpool, por reagoi duke marrë dy fitore radhazi, që e ngjitin në kuotën e 6 pikëve.
Nga ana tjetër Sheffield United ka bërë një start zhgënjyes, pasi ka marrë tre humbje në tre javët e para dhe është në kuotën e zero pikëve, ndonëse duhet thënë se kundërshtarët nuk kanë qenë të nivelit të lartë.
