Debutuesi i elitës së futbollit të Kosovës, Arbëria nga Dobraja e Madhe e Lipjanit, nuk njeh humbje në katër javët e para.
Ata sot arritën rezultat pozitiv në duel me Feronikelin nga Drenasi, duke luajtur baras (0:0) në ndeshjen që u zhvillua në stadiumin “Agron Rama” në Kastriot.
Në minutën e 10-të, mysafirët patën rast të mirë por Pnishi nuk u tregua i suksesshëm.
Në pjesën e dytë, Ibrahimi del në pozitë ideale por për fat të keq të tij dhe për fat të mirë të Feronikelit, topi shkoi mbi portë.
Në minutën e 72-të, sikur Bahtiri të ishte më i qetë edhe mund të shënonte, por godet dobët në drejtim të portës së Feronikelit. Arbëria e fortë, barazon me Feronikelin
Feronikeli kërkon penallti për një prekje me dorë në zonë por gjyqtari Tefik Maloku hesht në minutën e 73-të.
Arbëria e trajneri Arbnor Morina, edhe më tej mbetet në kreun e tabelës me 8 pikë, ndërsa “Nikli” zë vendin e tretë me 5 pikë.
Arbëria deri me tash ka dy fitore si mysafirë (0:2 ndaj Trepçës ’89, 0:3 kundër Besës) dhe dy barazime (1:1 me Prishtinën, 0:0 me Feronikelin) në cilësinë e vendasit (ndeshjet i luajnë në Kastriot).
Trajneri Afrim Tovërlani me Feronikelin kërkuan trepikëshin në Kastriot por nuk ia dolën ndaj Arbërisë jashtëzakonisht të fortë. Në javën e pestë, Feronikeli e pret Dritën dhe Arbëria i shkon Gjilanit.