Pas shkarkimit të trajnerit Muharrem Bajrami, rolin e trajnerit të Shkupit nga sot e merr ish-trajneri Umit Karan, i cili menjëherë ka filluar punën me ekipin, për sfidën e radhës që do të zhvillohet në fundjavë.
"Në zyrat e klubit Karan me ndihmësit e tij, Armend Nexhipi, Volkan Sayilgin dhe Ahmet Ozen kanë marrë besimin e kryesisë për të udhëhequr me klubin deri në fund te sezonit, me mundësi që bashkëpunimi të vazhdojë edhe më tej", njoftonFC Shkupi.
“Fillimisht dua të falënderoj të gjithë, në jetën time kam dy ekipe më të dashura, njëra është Galatasaray dhe tjetra Shkupi. Jam shumë i lumtur që përsëri jam në Shkup dhe do e vazhdoj punën për të cilën mendoj se e kishim lënë në gjysmë, pra erdha këtu për ta kryer punën deri në fund. E falënderoj pronarin e klubit Olgun Aydin, po ashtu edhe drejtorin sportiv dhe kryetarin e klubit Suat Alija që më dhanë mundësi të jem përsëri këtu.
E nesërmja në futboll asnjëherë nuk është e garantuar. Ish-trajneri i klubit Muharrem Bajrami është një mik i imi, me të cilin kemi pasur në të kaluarën bashkëpunim fantastik, ai si kapiten i ekipit dhe unë si trajner, por në futboll ndodhin edhe gjëra të paparashikueshme.
E falënderoj për kontributin e dhënë deri më tani, ndërsa ne shpresojmë që me ekipin që posedojmë të bëjmë gjëra të mëdha dhe të arrijmë të dalin kampion në fund të sezonit. Siç e kam cekur, kemi një ekip cilësor, me të cilin duhet punuar shumë për të arritur objektivat. Na priftë e mbara”, ka thënë Umit Karan.
Skuadra e futbollit Shkupi vazhdon garat në kampionat duke qenë në pozitën e dytë në renditje të tabelës, ndërsa ndeshja e radhës është ajo kundër Borecit nga Velesi, që luhet të shtunën në stadiumin e Çairit.
