Futbollisti me origjinë shqiptare, Enis Bardhi ka folur rreth ndeshjes së PlayOff-it kundër Kosovës në Ligën e Kombeve.
Bardhi i cili mbron ngjyrat e Përfaqësueses së Maqedonisë është shprehur i kënaqur me suksesin ndaj Kosovës, por sipas tij, përfaqësuesja që ai përfaqëson ka edhe një ndeshje për kualifikim në Evropian.
“Jemi shumë të kënaqur që e kaluam me sukses ndeshjen me Kosovën, por nuk ka përfunduar asgjë. Kemi edhe një 90-minutësh për kualifikimin” ka thënë Bardhi për Supersport.
Tutje, ai ka thënë se ndeshja kundër Kosovës ishte e veçantë për të dhe sipas tij, Përfaqësuesja e Kosovës në futboll shumë shpejt do të shkojë në Evropian.
“Edhe Kosova zhvilloi një ndeshje të fortë, më vjen keq për djemtë, por kam besim se shumë shpejt do të shkojë në Evropian. Përballja me Kosovën ishte e veçantë. Pas ndeshjes kam pasur komente pozitive dhe negative. Çdo futbollist duhet të japë maksimumin për ekipin ku luan”, ka shtuar tutje ai.
Ai është shprehur se është shqiptar dhe se këtë fakt sipas tij nuk e mohon askush, por që tani duhet ta japë maksimumin për Maqedoninë e Veriut.
“Jam shqiptar e nuk ma mohon askush, por tani do të jap maksimumin për Maqedoninë për përparimin edhe në aspektin profesional. Nuk kemi pasur kurrë probleme brenda skuadrës, kemi respekt për njëri-tjetrin dhe në fushë japim maksimumin. Si ekip mund të bëjmë një histori që nuk e ka bërë askush”, ka thënë Bardhi.
