Të gjithë lojtarët e Real Madridit janë në përkrahje të trajnerit Zinedine Zidane dhe të gjithë do të luftojnë deri në vdekje për të, ka thënë mbrojtësi i krahut Dani Carvajal.
Zidane është nën presion të madh në “Santiago Bernabeu” ku ekipi i tij qëndron i katërti në La Liga pas humbjes së thellë që pësuan të dielën kundër Valencias me rezultat 4:1.
Madrid po ashtu janë në pozitën e tretë në Grupin B në kuadër të Ligës së Kampionëve, pas humbjes kundër Shahktar Donetsk, barazimit me Borussia Monchengladbach dhe së fundmi duke regjistruar fitoren e parë në këtë garë kundër Interit.
Pavarësisht kësaj ecurie jo të mirë, Dani Carvajal ka folur për “Marca” duke thënë se të gjithë në klub janë duke e përkrahur teknikun francez.
“Ne jemi me trajnerin deri në vdekje. Të gjithë lojtarët në klub pajtohemi me filozofinë e lojës së tij. Ne kemi besim në të dhe në fund do të jemi ata që do ta fitojmë titullin së bashku me të”, tha Carvajal.