Cristiano Ronaldo mund të ketë interesin e Mançester Junajtid që kërkon ta rikthejë në “Old Trafford”, por edhe të PSG-së, por në orët e fundit nga Portugalia vijnë lajme se kampioni luzitan pritet që të zgjasë marrëveshjen e tij me Juventusin.
Ndonëse Kristiano Ronaldo ka edhe një tjetër sezon në kontratën me bardhezinjtë (skadenca 30 qershor 2022), klubi torinez nuk kërkon të heqë dorë kaq shpejt nga CR7, duke parë edhe benefitet që ka sjellë ai në marketin, përveç rezultateve të fushës.
Ideja e presidentit Andrea Anjeli është që të zgjasë bashkëjetesën deri në verën e vitit 2023, duke i konfirmuar Ronaldos të njëjtën pagë aktuale, prej 31 milionësh në sezon. Një sakrificë e tillë sigurisht që do të vlerësohet edhe në vazhdim, duke parë se shpresa e madhe është ajo e rikthimit të shpejtë të tifozëve dhe rifillimit të mbushjes së arkave të klubit nga paratë e biletave.
Por nëse pandemia dhe vaksinimi do të sjellin ndryshimin e pritur dhe rikthimin e mbushjes së stadiumeve, atëherë ndoshta Ronaldo mund të këmbëngulë edhe për një rinovim dyvjeçar, siç ishte biseduar përpara shpërthimit të Koronavirusit në botë.
