Elseid Hysaj me shumë gjasa nuk do ta vazhdojë kontratën e tij me Napolin.
Mbrojtësi shqiptar është futur në vitin e fundit të kontratës me napolitanët dhe deri më tani nuk ka marrëveshje për vazhdimin e saj.
Ka qenë agjenti i lojtarit, Mario Giuffredi që ka thënë për mediat italiane se me 60 përqind të gjasave Hysaj nuk do të vazhdojë kontratën.
“Unë mendoj se 60 përqind Hysaj nuk do ta vazhdojë kontratën, ndërsa 40 përqind tjera po”, deklaroi Giuffredi.
26-vjeçari është pjesë e Napolit që nga vera e vitit 2015 kur iu bashkua nga Empoli për shumën e pesë milionë eurove.
Mediat italiane kanë raportuar se për lojtarin ka interesime nga vende të ndryshme evropiane.
Roma mbetet një nga skuadrat që e do atë, ndërsa Atletico Madrid, Olympique Marseille, Spartaku i Moskës dhe Schalke 04 gjithashtu duan transferimin e shqiptarit në verë si lojtar të lirë.
Reprezentuesi shqiptar këtë edicion ka luajtur në 10 takime për Napolin, ku ka arritur të bëjë një asistim.
