Lila fajëson Deden për largimin: Është kapiteni i anijes, nuk kam parë kurrë në jetë që…
Andi Lila ka fajësuar Nevil Deden, për largimin nga drejtimi i Tiranës vetëm pak minuta para ndeshjes. I ftuar në procesin sportiv, ish-lojtari i Kombëtares dhe Tiranës, është shprehur se trajneri për ekipin është si kapiteni i anijes dhe nuk mund ta braktiste në atë mënyrë.
“Unë jam rritur te Tirana, e di psikologjinë e klubit, e njoh shumë mirë. Zoti Halili është njeri shumë i mirë, sportdashës dhe me ndjenja. Deklarata ishte emocionale, me atë që ndodhi. Gjatë karrierës, nuk kam parë që trajneri të ikë 15 minuta para ndeshjes. Nuk dua të mbaj anën e askujt, por nuk më ka pëlqyer mënyra se si iku trajneri para ndeshjes. Duhej të mbaronte ndeshja, e pasi të mbaronte në fund t’u jepte dorën të gjithëve dhe të largohej.
Kur një trajner pranon të firmosë, duhet të marrë parasysh e të shohë politikat e klubit. Nuk mbaj anën e askujt por trajnerin e shoh si kapiten anije.
Mbaro ndeshjen dhe ik. Një largim një çerek ore para ndeshjes nuk e kam parë asnjëherë, mendoj për ata futbollistë që ishin sot që ngelën pa trajner”, tha Lila.
