Ezgjan Aliovski duket se do ta vazhdoj karrierën te Leeds United, duke hedhur poshtë ofertën e Galatasarayt.
Gjiganti turk ka qenë në bisedime me anësorin shqiptar, por duket se Aliovski ka vendosur të mbetet në Angli.
28-vjeçari është pjesë e Leedsit që katër vite dhe këtë edicion po luan për mrekulli në Ligën Premier.
Trajneri Marcelo Bielsa ka thënë se është e rëndësishme që Gjani të dëshirojë qëndrimin në Leeds dhe natyrisht edhe klubi do ta dojë tani qëndrimin e tij.
“Gjëja më e rëndësishme është se ai dëshiron të qëndrojë. Lojtari duhet ta zgjedhë klubin dhe më pas klubi vendos se a e dëshiron atë. Nëse Aliovski e zgjedh Leedsin, Leedsi do ta zgjedhë Aliovskin”, ka deklaruar trajneri Marcelo Bielsa për BBC.
Edhe reprezentuesi i Maqedonisë së Veriut ka thënë se ndihet i lumtur në klubin anglez.
“Të luash në këtë skuadër, me këtë stil të lojës është diçka e shkëlqyer dhe unë po përmirësohem çdo ditë”.
“Po mësoj çdo ditë diçka dhe gjëja më e mirë është se në Ligën Premier luan kundër ekipeve dhe lojtarëve më të mirë në Evropë. Më pëlqen këtu ku jam”, ka deklaruar Alioski.
