Vera e këtij viti do të jetë padyshim e nxehtë për skuadrën e Juventusit e cila duhet të ndërtojë tashmë një cikël të ri nën drejtimin e Andrea Pirlos, gjithmonë nëse ai do të jetë trajneri i bardhezinjve edhe në edicionin e ardhshëm.
Mediat italiane flasin për një revolucion dhe janë të bindura se do të ketë ndryshime drastike për të ndërtuar gjithçka nga e para në një skuadër e cila përveç Champions ku nuk bën dot diferencën, tashmë ka humbur edhe dominimin e saj në kampionat.
Sipas “Il Giornale”, tashmë është bërë gati lista e ndryshimeve dhe ajo fillon me senatorët.
Emra si Bufon e Kielini mund të largohen, ose t’u jepet një rol dytësor në klub, duke besuar më shumë te të rinjtë dhe lojtarët me të cilët pritet të përforcohet prapavija e ekipit në muajt në vijim.
Më pas, edhe mesfusha do të pësojë ndryshime të mëdha me Ramsej, Bernardeski, Rabio e Bentankur që do të rishikojnë pozitat e tyre, por parashikohet që të largohen të paktën 2.
Njëkohësisht, edhe Paulo Dibala nuk shihet më si pjesë e projektit, pasi aktualisht edhe dëshira e lojtarit duket se nuk është të qëndrojë te bardhezinjtë ku vihet shumë shpesh në diskutim. Bisedimet për rinovimin janë ndërprerë dhe tani kërkohet një blerës për futbollistin.