Drejtori i Juventusit, Fabio Paratici, ka thënë se Andrea Pirlo mbetet pjesë e strategjisë së klubit, mirëpo janë përpara pesë ndeshje që pritet të vendosin të ardhmen e tij.
Bianconerët kanë mbetur 10 pikë prapa Interit në garën për titullin e Serie A, ndërsa u eliminuan nga Liga e Kampionëve në fazën e 1/8 së finales nga Porto.
Humbja nga Benevento në fundjavë i ka zbehur shumë gjasat që Zonja e Vjetër ta fitojë titullin e dhjetë në kampionatin italian.
Tuttosport shkruan se Pirlo duhet t’i ndryshojë gjërat përnjëherë nëse dëshiron ta mbajë punën, derisa sipas Calciomercato.com, kualifikimi në Ligën e Kampionëve nuk do të mjaftojë që ai të jetë trajner edhe në sezonin 2021/2022.
Kanë mbetur edhe dhjetë ndeshje kampionale (30 pikë në dispozicion) deri në fund të sezonit në Serie A, ndërsa katër prej tyre janë kundër pretendentëve të drejtpërdrejtë për top-katërshe.
Juve do të jetë nikoqir i Napolit më 7 prill (për ndeshjen e mbetur nga xhiroja e tretë), ndërsa paraprakisht (3 prill) zhvillon derbin e Torinos.
Më 18 prill udhëton te Atalanta, derisa më 9 dhe 16 maj zhvillon derbit ndaj skuadrave milaneze, Milan dhe Inter, në Allianz Stadium.
Njëherësh, Zonja e Vjetër do ta zhvillojë finalen e Kupës së Italisë kundër Atalantas më 19 maj.
Këto pesë ndeshje të përmendura pritet të jenë vendimtare për të ardhmen e Pirlos, i cili doemos duhet të shmangë humbja të tilla si ajo ndaj Benevento dhe të sigurojë kualifikimin në Ligën e Kampionëve.
