Policia e Kosovës ka njoftuar se nesër (e diel) do të ketë bllokim të rrugëve përreth stadiumit “Fadil Vokrri”, për shkak të ndeshjes kualifikuese për “Katar 2022” ndërmjet Kosovës dhe Suedisë.
Përmes një njoftimi në faqen zyrtare, Policia e Kosovës kërkon ndihmën dhe mirëkuptimin e qytetarëve dhe lusin qytetarët t’i shmangin lëvizjet në drejtim të stadiumit.
Ky është njoftimi i plotë i Policisë së Kosovës:
Nesër do të ketë bllokim të rrugëve përreth stadiumit "Fadil Vokrri", për shkak të ndeshjes Kosovë-Suedi
Prishtinë, 27 mars 2021-Drejtoria Rajonale e Policisë në Prishtinë ka bërë përgatitjet për të ofruar siguri për ndeshjen që nesër zhvillohet në stadiumin “Fadil Vokrri” në mes të Kosovës dhe Suedisë.
Për të mundësuar një qarkullim në suaza të normales, policia do të veprojë në të gjitha rrugët të cilat lidhen me stadiumin “Fadil Vokrri”, duke vendosur pikat e kontrollit me qëllim të ndalimit dhe udhëzimit të automjeteve.
Bllokimet dhe kufizimet në zonën përreth Stadiumit do të bëhen, bazuar në vendimin e lëshuar nga Komuna e Prishtinës, respektivisht Drejtoria për shërbime Publike.
Plani në fjalë do të fillojë të implementohet nesër prej orës 07:00, deri në pëfundim të ndeshjes, ku do të ndërpritet qarkullimi dhe ndalohet parkimi i të gjitha automjeteve në rrugët: “Enver Zymberi” dhe “Rinia”.
Andaj për të përballuar sa më lehtë rrethanat që do të paraqiten në qarkullimin rrugor, kërkojmë ndihmën, besimin dhe mirëkuptimin e gjithë qytetarëve dhe veçanërisht lusim qytetarët e kryeqytetit që të shmangin lëvizjet e tyre drejt stadiumit të qytetit me vetura.
